ACCUEIL
La cooperativa Euralis qu’ei partenària de BioBéarn, ua unitat de metanizacion espleitada per TotalEnergies. Alimentada en dèishas organicas hornidas sustot per Seretram e per neuridors identificats per la cooperativa. Aquera unitat navèra que produseish biometan e digestat que los agricultors pòden utilizar per l’espartiment au lòc deus engrèishs quimics . Explicacions.
Lo projècte BioBéarn qu’ei estat engatjat autanlèu 2016, en concertacion dab las partidas beneficiàrias locaus, e Euralis que s’ei lèu posicionat com l’un deus partenaris principaus. « Qu’ei un projècte au long cors » que precisa Christian Matheu, responsable desvolopament de la cordèra metanizacion en çò d’Euralis. « Los prumèrs espartiments de digestat que sorteishen d’estar hèits».
Aquera associacion qu’ei lo parat, cada annada, de :
– valorizar 95 000 tonas d’intrants d’origina agroalimentària (majoritàriament de las broyats de milhòcs doç hornits per Seretram e quauquas dèishas de tuaders) o d’origina agricòla (lisiers de pòrcs, bovins e guit) ;
– produsir dens un prumèr temps 69 GWh de biometan e 86 000 m³ de digestat liquide puish, a plea capacitat, 160 GWh de biometan (sia l’equivalent de la consomacion annau mejana de 32 000 abitants) e 200 000 tonas de digestat (evitant 5 000 tonas d’engrèish quimic).
« lo digestat qu’ei un fertilizant naturau valorizat en espartiment agricòla sus parcèlas cultivadas per espleitadors dens un rai de 50 km a l’entorn de l’unitat » que persegueish Christian Matheu .
La contribucion d’Euralis au projècte
Euralis qu’a contribuat ad aqueth projècte de metanizacion de mantua faiçon. Purmèr, entà la partida intrants, la cooperativa qu’a participat a la recèrca de dèishas vegetaus : qu’a mobilizat Seretram, un deus sons partenaris istorics, qui horneish 45 000 tonas de broyats de milhòc doç per an, sia drin mei de la mieitat de la biomassa. Qu’a tanben identificat ua partida deus neuridors susceptibles de hornir lisier. Au dia de uei, que son ua centena petita, neuridors de pòrcs e de palmipèds operant dens un rai de 50 km a l’entorn deu méthaniseur. En aval, Euralis, qu’a mobilizat los agricultors susceptibles d’aderir au plan d’espartiment. « Suu terren, los nostes conselhèrs d’espleitacion que’us an explicat l’interès qui avèvan a utilizar digestat, un fertilizant naturau competitiu. Qu’a calut har pedagogia » que soslinha Christian Matheu .
Los avantatges de l’espartiment entaus agricultors
Uei, 161 agricultors que hèn partida deu plan d’espartiment. Tots que demoran dens un rai de 50 km a l’entorn deu site BioBéarn. Emplegar aqueth fertilizant naturau que’us permet de redusir de mieitat la lor consomacion d’engrèishs quimics (2 230 tonas per an) e donc de har economias (haut o baish 18 % de reduccion deus còsts deus engrèishs, prestacion d’espartiment qu’includesca). L’espartiment qu’a tanben un interès agronomic. Ric en elements fertilizants, lo digestat ne contien pas indesirables, sonque azòte e carbòni organic qui neureish lo sòu, e azòte amoniacau, qui neureish la planta. Fin finau, lo digestat qu’ei « igienisat » ; qu’a donc l’avantatge de non pas aver nosenças olfactivas.
Ua pujada de poténcia de l’unitat de metanizacion
Dens los mes qui vienen, l’unitat de metanizacion que va pujar en poténcia e la quantitat d’intrants que deurà aumentar en consequéncia, entà aténher las 160 GWh de produccion de biometan mirada per TotalEnergies. Qu’estudiam mei que tot la produccion de culturas intermediàrias a vocacion energetica (culturas forrastèras o cerealas per exemple) entà aténher aqueth objectiu. « Qu’èm fièrs de contribuar ad aqueth projècte de metanizacion e de miar agricultors aus nostes costats. Qu’ei ua faiçon d’encoratjar las practicas agricòlas duradissas e de perméter aus espleitadors de realizar economias suus còsts deus intrants. Aquera produccion d’energia verda que contribua egaument a la sobeiranetat energetica de França e a la vitalitat economica deu territòri. En efèit, l’unitat BioBéarn qu’a creat 5 emplecs dirèctes e un vintenat d’emplecs indirèctes. Tot aquerò qu’ei perfèitament en linha dab l’estrategia d’Euralis e los nostes engatjaments RSE en particular » que soslinha Laurent Dubain, director generau deu Pòle Agricòla.
Jean-François Cazeres, agricultor a Monmans, que hè partida deu plan d’espartiment. Jean-François Cazeres qu’a ua bòrda familiau en Gaec, dab la soa hemna e lo son hilh, en polyculture (mongetas verdas e milhòcs semença) e neurissatge (bovins carn). « Qu’ei lo men conselhèr d’espleitacion qui m’a parlat deu plan d’espartiment corrent 2021. Qu’èi acceptat la soa proposicion entà duas rasons . Purmèr, pr’amor qu’aquò que’m permet de realizar economias suus còsts deus intrants, sustot despuish la recenta eslamada deus prètz ! Puish, pr’amor qu’i vedi un interès agronomic : aver recors a l’espartiment, qu’ei utilizar mensh de produits quimics e donc aver un sòu mei equilibrat en oligo-elements, mensh acidificat. Qu’espèri los prumèrs espartiments a la prima . Qu’èi prèssa de véder los resultats »