Un plan de formacion entà acompanhar la transformacion

La cooperativa Euralis qu’a causit lo conselh dens l’encastre de la lei Egalim. Entà acompanhar las transformacions màgers deu modèle d’ahars com mestièrs ligats ad aquera causida estrategica, lo Pòle Agricòla qu’a aviat un plan de formacion cap aus sons collaborators. « En tot, 1,2 milions d’euros que son estats engatjats dens lo desvolopament de las competéncias de las equipas » que precisa Laurent Teysseyre, DRH deu Pòle. « Enter 2021 e 2023, mei de 30 000 òras de formacion que son estadas dispensadas . Que s’ageish d’investir au servici deus òmis e de las hemnas d’Euralis. Que son las fòrças vivas au còr d’aqueras transformacions e qu’incarnan lo projècte d’enterpresa. En los formant, que’ns balham los mejans de s’i escàder dens la nosta mutacion ».

Un vaste plan de formacion : apréner purmèr navèths saber-èste e formà’s aus sabers fondamentaus de l’agronomia

Las equipas RH, formacion e los Responsables de Zònas Euralis qu’an co-bastit aqueth vaste plan de formacion dab diferents organismes, segon los objectius e las competéncias esperats.

Purmèr, qu’i avó un acompanhament sus los saber-estar, engatjat a comptar de  2021, entà perméter aus collaborators de desvolopar un apròchi conselh tot en estar business partners deus agricultors. L’organisme Réseau Motival qu’a desvolopat entà aquò formacions collectivas personalizadas (DRILL) mes tanben modules de coaching, dirèctament en çò deus agricultors.

Las equipas que son tanben estadas formadas suus fondamentaus de l’economia de l’espleitacion e de l’agronomia, per un module de 7 dias gavidat per Arvalis. La region Navèra Aquitània que s’ei engatjada aus nostes costats en cofinançant aqueths trajèctes.

… Formà’s a l’agro ecologia après

Dens un segond temps, que son intervienudas las formacions mei tecnicas, centradas sustot sus l’agro ecologia. Tots los conselhèrs que son concernits, sia 55 estagiaris despartits en 4 grops  qui corresponen a las culturas de las diferentas zònas geograficas deu territòri cooperatiu. Qu’avem atau hidat a Unisphères la concepcion e l’aviada de trajèctes dedicats a l’agricultura regeneratora. Sheis dias de formacion dont lo contienut ei estat desvolopat  especificament entà Euralis tà que lo temps passat en formacion sia au mei har profieitós aus conselhèrs e que’n ressòrten dab atrunas de bon hicar en plaça en çò deus agricultors e qui responen aus lors enjòcs com aus d’Euralis.

« Qu’avem concebut modules practics » que completa Sebastian Roumegous, director d’Unisphères. « Que’s compausan de matiadas en sala, entà abordar la teoria, e de vrèspe suu terren, en çò deus agricultors. Lo prètzhèit qu’ei d’experimentar las solucions tecnicas e de tastar la lor pertinéncia. Lo trajècte qu’ei complet e qu’ei  calcat suu cicle culturau, en mei de prepausar las basas de l’agricultura regeneratora : los cobèrts vegetaus, lo deserbatge agronomic e mecanic, la santat e la nutricion de la planta, e fin finau ua sequéncia de bilanç destinada a bastir itineraris de cultura a baish intrants ».

“Poder arcuélher lo men conselhèr d’espleitacion, a noste, pendent la soa formacion, qu’ei ua vertadera oportunitat” ce ditz Stéphane Teixido, agricultor aderent qui obrí las pòrtas de la soa espleitacion entà la fasa suu terren. “ Que’m torni tostemps  disponible entad aqueth tipe de collaboracion pr’amor qu’ei ganhant-ganhant ! Lo men conselhèr qu’ei lo qui coneish lo mei plan la mea faiçon de tribalhar, las particularitats de las meas parcèlas, los mens objectius. Qu’ei sus-mesura. E vedè’u hicar en practica, a noste, çò qu’a aprés en formacion, qu’ei forçadament bònus”.

Joëlle Bouyrie, conselhèra d’espleitacion, tot dòi diplomada : « aquera formacion que m’a aprés a reméter l’agronomia au centre deu men mestièr de conselhèra d’espleitacion atau com au centre de las practicas deus agricultors qui acompanhi. Un espleitador qui arrespècta la tèrra e qui prèsta atencion aus sòus qui tribalha que veirà, en retorn, los sons rendements lèu melhorats. Dab, au finau, ua plusvalua financèra e agro ecologica. Qu’ei ganhant-ganhant ».

E tà la seguida ?

Aqueths acompanhaments hard e soft skills que perdura en 2023, per talhèrs practics au camp en petits grops e los naus vienuts en çò d’Euralis qu’auràn l’escandença de beneficiar d’aqueths trajèctes. Lo dispositiu que perdura sus l’annada dab formacions tanben previstas en agro ecologia entà las foncions supòrt (marcatica e desvolopament comerciau) dab la mira de tribalhar mélher la construccion de las cordèras duradissas dab los clients capvath.

En parallèla d’aqueths acompanhaments animats per partenaris extèrnes, un acompanhament intèrne qu’ei tanben a s’estructurar entà assegurar ua continuitat de formacion dens las annadas a viéner. Las equipas de la direccion Marcatica e Innovacion que seràn relais claus dens la perseguida d’aqueras formacions .

Laurent Dubain, Director Generau deu Pòle Agricòla que concludeish : « lo plan de formacion desplegat despuish dus ans qu’ei estat concebut entà sostiéner lo projècte deu Pòle Agricòla. Que comptam suus nostes conselhèrs d’espleitacion entà bastir cordèras duradissas e responsablas e entà acompanhar los agricultors cap a navèras practicas. Mei largament, aquera desmarcha que traduseish la nosta volontat de balhar sens e de recercar resultat e proessa que sia entaus collaborators formats qu’entaus agricultors qui benefícian de conselh a valor aponduda ».

Retrobatz la ceremonia de remesa deus diplòmas en agroécologie.