ACCUEILLo Conselh d’administracion de la mandatura navèra de SEMAE, dont la purmèra amassada s’ei tienuda lo divés 22 de seteme de 2023, qu’a elegit a l’unanimitat Pierre Pagès, com President e François Desprez com Vicepresident entà un mandat de tres ans.
La cordèra semenças e plants, lhevader màger entà relhevar los futurs desfís
Com navèth president de SEMAE, après estar estat Vicepresident, Pierre Pagès que va perseguir las missions de l’interprofession de las semenças e plants qui, com prumèr malhon de la cadena alimentària, deu relhevar nombrós desfís : demografic, cambiament climatic, evolucion de las practicas culturaus, diminucion deus mejans de produccion disponiblas.
L’interprofession e los actors de la cordèra que son pleament mobilizats e engatjats e las semenças e plants qu’auhereishen nombrosas e multiplas solucions. Com ac soslinha Pierre Pagès : « quauquas annadas a l’interprofession qu’a elaborat un projècte estrategic qui ns’a condusit a engatjar ua pregonda transformacion qui’s persegueish. Qu’avem portat aqueths cambiaments dab François Desprez suus dus darrèrs mandats, e que vam perseguir dab lo sostien de tots ».
Lo Conselh d’administracion d’aqueth dia qu’a tanben enterinat lo renovelament deus membres deu Burèu de l’interprofession qui arcuelh aus costats deus ancians membres, Thomas Bourgeois, vicepresident de la seccion Cerealas e Protéagineux, Jean-François Roussel, president de la seccion Plants de patanas, Laurent Bourdil, president de la seccion de las Plantas oleaginosas, dus navèths elegits : Stéphane Ducroquet, president de la seccion diversitat de las semenças e Laurent Guerreiro, president de la seccion plantas forrastèras e tascat.
Pierre Pagès qu’a acabat la soa presa de paraula en mercejar « l’ensemble deu Conselh d’administracion entà la soa hidança dens las accions e projèctes engatjats e las equipas de SEMAE entau lor engatjament »
SEMAE : mei que jamei au servici d’ua ambicion comuna
Hòrta de sheis decennias d’istòria, l’interprofession de las semenças e plants qu’ei sinonime d’exigéncia, d’engatjaments d’òmis e de hemnas passionats, implicats dens mestièrs estretament ligats, solidaris deu capsús au capvath, portant las valors e los interès de la cordèra deu nivèu territoriau dinc a l’internacionau. Sola interprofession a perseguir ua mission de servici public hidada per l’Estat, qu’assegura lo contròle e la certificacion de la qualitat de las semenças e plants, entà totas las agriculturas e la diversitat deus utilizators.
François Desprez, lo Vicepresident navèth de SEMAE, après estar estat President, qu’insisteish : « Au delà de la promocion eficaça deus interès deus membres de la cordèra, SEMAE qu’a l’ambicion suplementària de sasir las preocupacions deu son environament au sens large, includint consumaires, ciutadans, ONG e societat civila, entà har evoluar la soa faiçon d’estar e d’agir ».
Òmis de conviccion
Brembam-nse que lo President navèth de SEMAE, Pierre Pagès, qu’ei agricultor multiplicador de milhòc dens lo Sud-oèst e Vicepresident d’Euralis, cooperativa agricòla e alimentària deu Sud-oèst. François Desprez, navèth Vicepresident de SEMAE qu’ei, eth, President deu grop Florimond Desprez, creator de varietats e de produccion de semenças.
Dus òmis de conviccion engatjats despuish bèra pausa dens lo maine de las semenças.