ACCUEILEuralis qu’a creat ua Organizacion de Productors (OP) oleoproteaginós consacrada au sòja, au virasó e au còlza. Qu’arrejunh l’OP legumes e los tres OP animaus dejà conegudas. Dab aquera Organizacion navèra, lo Pòle Agricòla qu’innòva e que contunha a encoratjar los agricultors a s’engatjar sus produccions duradissas. Explicacions.
Çò qu’ei ua Organizacion de Productors (OP) ?
Las OP que son lo perlongament de la cooperativa. Que son constituïdas a l’iniciativa d’un ensemble d’agricultors qui, per la lor adesion, s’amassan a l’entorn d’ambicions comunas : mutualizar los lors mejans entà reequilibrar las lors relacions comerciaus dab los actors economics capvath de la lor cordèra, valorizar, organizar e perennizar la lor produccion.
La navèra OP Oleoproteaginós e legumes secs d’Euralis
Cò adara reservats au sector Hruts & Legumes, los Programas Operacionaus que son estats espandits a las cordèras « Proteïnas Vegetaus », dens l’encastre de la PAC 2023-2027 ; citem au demiei d’eras las cordèras sòja, virasó, còlza e legumes secs. Aqueras extensions de programas qu’an per ambicion de sostiéner la dinamica engatjada dens l’encastre de l’Estrategia Nacionau en favor deu desvolopament de las Proteïnas Vegetaus (SNPV).
Dens aquera dinamica, e dab l’alargament deu son camp de reconeishença obtienut fin 2025, l’OP Oleoproteaginós e Legumes secs d’Euralis que cobreish d’ara enlà, en mei deus legumes secs, las produccions seguentas (convencionau e bio) : sòja a destinacion de l’alimentacion animau e umana, virasó e còlza.
Los avantatges d’aderir a l’OP navèra Sòja, Virasó, Còlza entà un agricultor
En signar la soa adesion a l’OP navèra, l’agricultor que benefícia a gratis d’Atrunas d’Ajuda a la Decision (OAD) qui’u permeten d’optimizar lo pilotatge deus sons cobèrts vegetaus entau virasó e sòja, e de l’azòte entau còlza. Que percep en mei ua ajuda dirècta enter 7 e 10 euros/tona versada en fin de collècta. Lo montant d’aquera prima qu’ei variable en foncion de la produccion e de l’annada. « l’agricultor qu’a tanben l’oportunitat de participar a amassadas tecnicas de seguit de resultats collectius » que precisa Thomas Blanquet, animator de l’OP. « Çò que’u permet, mercés au partatge deus retorns d’experiéncias e a l’acompanhament deus conselhèrs d’espleitacion d’Euralis, d’optimizar las soas practicas agronomicas, e de corregir lo tir, a har un tribalh de campanha, autan necessària ». Las prumèras amassadas tecnicas au camp que’s son tienudas a la mieitat d’abriu ; que son estadas consacradas a l’implantacion deu còlza, la proteccion contra las malaudias e los desguastaires e la fertilizacion. En tot, 500 agricultors que son estats convidats.
Los engatjaments deus aderents a l’OP
Com productor de l’OP, l’agricultor que s’engatja a aderir a la cooperativa, a respectar l’apòrt minimum de 70% de la o las culturas causidas, e segur a arrejúnher l’OP en signar un bulletin d’adesion de 5 ans entà la o las espècias entà las quaus adereish. Que s’engatja fin finau a reglar ua cotizacion fixada a 1 €/ha.
Las ambicions de l’OP navèra
A tèrmi, lo Pòle Agricòla qu’ambiciona de har aderir 1 000 productors, entà 20 000 ha en tot, dont 3 000 de còlza, 9 500 de virasó e 7 500 de sòja dens l’annada qui vien, ciblats sus l’ensemble deus territòris de la cooperativa. « Au dia de uei, qu’avem tocat mei d’un tèrç deu noste objectiu » qu’explica Philippe Theil, Director de las Produccions vegetaus deu Pòle Agricòla. « Qu’èm contents d’aqueths prumèrs resultats qui s’inscriven dens la volontat de la cooperativa d’innovar, d’anar cap tà practicas duradissas e vertuosas. Aquera navèra OP illustre tanben la nosta volontat d’acompanhar tostemps mélher los nostes aderents, per un conselh sus mesura e de qualitat ».
Contact presse : Nathalie Salmon – 06 48 08 52 88 – nathalie.salmon@euralis.com