ACCUEILAnonciada l’estiu passat, la desmarcha de descarbonacion deu site lescarien d’Euralis que vad un projècte de territòri cap e tot. Lo grop cooperatiu e la Comunautat d’Aglomeracion Pau Bearn Pirenèus que van enterpréner la connexion deu site de Lescar au hialat de calor urban (RCU). Le prètzhèit qu’ei l’ahortiment de la proessa energetica d’Euralis e la consolidacion de la sobeiranetat energetica locau. La mesa en servici de las installacions navèras deu site de Lescar atau com la soa connexion au RCU son programadas a l’estiu 2027. Las òbras que seràn aviadas d’ací la fin deu mes.
Biomassa, fotovoltaïca, geotermia e hialat urban : ua mesclanha ganhadora
Iniciaument fondat sus un triptic biomassa, fotovoltaïca e geotermia, Euralis qu’a decidit d’ahortir la soa desmarcha de descarbonacion en investir dens lo RCU.
« En ligar biomassa, fotovoltaïca, geotermia e RCU, lo noste site de Lescar que va dividir la soa consomacion de gas per tres. Aqueth saut tecnologic que’ns va perméter de passar ua estapa màger dens la nosta estrategia de descarbonacion en redusir las nostas despensas energeticas e en modernizar las nostas atrunas industriaus. Au delà d’aqueths beneficis manifèstes per las nostas activitats, lo noste investiment dens lo RCU qu’ei tanben, com cooperativa, un engatjament hòrt au servici deu noste territòri » ce testimònia Christophe Congues, President deu Grop Euralis.
Quan actors privats e publics e s’amassan entà la transicion e la sobeiranetat energetica locau
La connexion deu site lescarien d’Euralis au Hialat de calor urban que sagèra ua aliança estrategica entau territòri. Aquera extension cap a l’oèst de l’aglomeracion paulina que va non solament auherir a Euralis ua solucion de descarbonacion robusta mes que va tanben perméter un desvolopament deu hialat dens aqueth sector. Navèths abonats que poiràn atau beneficiar d’ua calor renovelabla d’origina locau, dont lo prèmi serà desconnectat de las fluctuacions deu cors de las energias fossilas.
« La vocacion economica e sociau d’Euralis suu son territòri cooperatiu qu’a encontrat de tira la nosta volentat de desvolopar, aus costats deu noste delegatari Pau Bearn Pirenèus Energias Servicis, lo hialat de calor urban a l’oèst. Aquera convergéncia de volontats, confirmada peus purmèrs estudis tecnics, qu’obreish perspectivas vertuosas en tèrmes de transicion e de sobeiranetat energetica. A tèrme, que poirem tanben imaginar que las installacions energeticas d’Euralis e posquin contribuar a alimentar lo hialat de calor en periòde de baisha consomacion industriau. » ce precisa Jérôme Marbot, Maire de Pau e President de l’aglomeracion Pau Bearn Pirenèus
Ua mobilizacion collectiva entà un desplegament operacionau a l’estiu 2027
La Region Novèla Aquitània e l’ADEME, partenàrias de la purmèra òra, atau com la SOFIAC, qu’an tornat afirmar lo lor sostien au projècte de descarbonacion deu site de Lescar en adaptar los lors dispositius a l’integracion deu hialat de calor urban.
« Peus sons dispositius d’acompanhaments, la Region Novèla Aquitània que sostien concrètament las enterpresas industriaus qui s’engatjan a substituïr las energias fossilas per energias renovelablas. En portar ua ajuda financèra aus estudis e aus investiments miats per las enterpresas laureadas, que las permetem d’accelerar la lor transicion energetica. Lo projècte d’Euralis qu’amuisha que dab investiments ciblats, ua industria be pòt redusir la soa mèrca carbòni de faiçon significativa » c’explica Guillaume Riou, Vicepresident de la Region Novèla Aquitània.
Las equipas d’Euralis, de l’Aglomeracion Pau Bearn Pirenèus e d’ENGIE que son d’ara enlà mobilizadas a l’entorn d’un calendari operacionau rigorós. Las òbras de connexion au RCU que seràn aviadas a la fin deu mes de junh mentre que la mesa en plaça de las autas honts d’energia (biomassa, fotovoltaïca e geotermia) que començaràn en seteme .
L’arribada en cap deu projècte qu’ei prevista entà l’estiu 2027 dab la mesa en servici completa de las installacions drin abans la collècta 2027 d’Euralis.